Ymddiriedolwr

Bwrdd yr Ymddiriedolwyr ydy’r prif gorff sydd yn gwneud penderfyniadau ar gyfer yr elusen, ac mae’r holl ymddiriedolwyr yn dod yn Gyfarwyddwyr anweithredol y cwmni. Mae’n gyfrifol am osod strategaeth gyffredinol, ac am sicrhau ei bod yn cael ei chyflawni gan Gyfarwyddwr Maint Cymru, y Dirprwy Gyfarwyddwr a’r tîm ehangach o 16. Mae’r Bwrdd yn cynnwys pobl sy’n dod â’r ystod o sgiliau proffesiynol a phrofiad personol a chyflogaeth sydd eu hangen i sicrhau bod yr elusen yn cael ei llywodraethu’n dda.

• Y tymor arferol yn y swydd ar gyfer Ymddiriedolwr yw tair blynedd, a gellir ei ymestyn.
• Dylech fynychu o leiaf 4 cyfarfod Bwrdd y flwyddyn, a dylai o leiaf 2 ohonynt fod wyneb yn wyneb os ydych yn byw yn y DU, fel arfer, ond nid yn unig yng Nghaerdydd. Os ydych chi’n byw dramor, byddai disgwyl i chi fynychu o leiaf un cyfarfod wyneb yn wyneb. Caniateir i chi ymuno â rhai cyfarfodydd o bell os oes angen, ynghyd â’r Cyfarfod Cyffredinol Blynyddol (fel arfer ar-lein).
• Mae Ymddiriedolwyr yn cael eu hannog hefyd i ymuno ag un is-bwyllgor, fel yr Is-bwyllgor Risg, yr Is-bwyllgor Cyllid, yr Is-bwyllgor Staff a Llesiant neu’r Pwyllgor Moeseg.
• Efallai y bydd cyfathrebu ad hoc rhwng Ymddiriedolwyr a Chyfarwyddwr a Dirprwy Gyfarwyddwr Maint Cymru yn digwydd hefyd drwy e-bost, WhatsApp, dros y ffôn a thrwy fideo-gynadledda.
• Mae’r swyddi yn wirfoddol, a bydd costau teithio rhesymol yn cael eu had-dalu.
• Mae’r amser sydd ei angen i gyflawni’r rôl hon oddeutu un diwrnod y mis, er bod adegau pan fydd hyn yn uwch. Gall ymrwymiad y tu allan i gyfarfodydd fod ar adegau sy’n addas i chi’ch hun.
• Darperir hyfforddiant a mentora os oes angen, ac mae cyfleoedd i ddatblygu eich gyrfa ac eich cyfnod fel ymddiriedolwr yn cael eu hannog, fel cynrychioli Maint Cymru mewn digwyddiadau / cynadleddau, neu ddod yn arweinydd ar gyfer rhanbarth prosiect, is-bwyllgor neu faes rhaglen.

Rydym yn elusen fechan ond effeithiol, gyda thîm ymroddedig sy’n gweithio ar ddiogelu coedwigoedd, addysg hinsawdd, eiriolaeth a chyfathrebu. Sefydlwyd Maint Cymru yn 2009 ac fe wnaethom gofrestru fel elusen yn 2011, a ni oedd y sefydliad cyntaf yng Nghymru i annog ymateb cenedlaethol i ddatgoedwigo trofannol a newid hinsawdd. Ein nod gwreiddiol oedd cefnogi Pobl Frodorol a chymunedau lleol i ddiogelu ardal o goedwig cyfwerth â maint Cymru, carreg filltir y gwnaethom ei chyrraedd yn 2013.

Ers hynny, rydym wedi tyfu’n eiriolwr strategol dros ddiogelu coedwigoedd ar draws y byd, cefnogi Pobl Frodorol a chyfiawnder hinsawdd, ac wedi adeiladu partneriaethau cryf a model holistaidd sy’n cysylltu addysg, newid polisi a gweithredu. Mae ein ffordd o weithio yn unigryw, gan ei fod yn mynd i’r afael ag achosion datgoedwigo mewn gwledydd sydd â choedwigoedd trofannol, yn ogystal â’r atebion sydd eu hangen yng Nghymru ac ar draws y byd.

Ein gweledigaeth yw creu planed iach lle gall pobl, coedwigoedd a natur ffynnu gyda’i gilydd. Ein pwrpas ydy cynnal a diogelu coedwigoedd trofannol, ac ymateb i’r argyfwng natur a hinsawdd.

Rydym yn rhedeg proses recriwtio hollol newydd a chynhwysol, i gael gwared ar rwystrau a rhagfarn ddiarwybod. Mae hyn yn cynnwys yr opsiwn i wneud cais ysgrifenedig neu gais ar lafar; Gweinyddwr Recriwtio sy’n sicrhau bod ceisiadau’n ddienw ar gyfer y panel dethol; a Chynllun Gwarantu Cyfweliad y gellir optio mewn iddo ar gyfer pobl o gefndiroedd ethnig amrywiol a phobl sydd yn byw gydag anabledd (rhagor o wybodaeth isod).

Darllenwch yr wybodaeth ganlynol yn fanwl:

• Sut i wneud cais
• Ffurflen gais
• Swydd-ddisgrifiad, gan gynnwys y Meini Prawf Dethol
• Cynllun Gwarantu Cyfweliad
• Tabl Asesu – Meini Prawf Dethol
• Ffurflen Monitro Cyfleoedd Cyfartal

Dylech anfon eich ceisiadau ysgrifenedig neu wedi’u recordio i dîm y Gweinyddwyr Recriwtio, drwy e-bost i [email protected] erbyn 12 hanner dydd ar ddydd Gwener, 26 Mehefin 2026.  Peidiwch ag anfon CV.

Os ydych chi angen help i lenwi’r ffurflen, cysylltwch â’r Gweinyddwyr Recriwtio drwy e-bostio [email protected].

Os ydych chi’n dewis gwneud eich cais drwy recordiad sain, cysylltwch â’r Gweinyddwyr Recriwtio os ydych chi angen help. Fel arall, dylech recordio eich hun yn ateb yr holl gwestiynau ar y ffurflen gais.

Os hoffech gyflwyno eich cais mewn ffordd arall, cysylltwch â’r tîm Gweinyddwyr Recriwtio. Byddwn yn gwneud y broses ymgeisio yn hygyrch i bawb.

Rydym yn croesawu ceisiadau yn Gymraeg. Byddwn yn defnyddio gwasanaeth cyfieithu i gyfieithu ceisiadau Cymraeg i’r Saesneg.

Ni fydd unrhyw ffurflenni Cyfleoedd Cyfartal neu ddata y gellir adnabod rhywun ohonynt, yn cael eu gweld gan y panel dethol neu gan y panel cyfweld.

Os oes gennych unrhyw gwestiynau am y broses ymgeisio neu am y rôl ei hun, cysylltwch â’r tîm Gweinyddwyr Recriwtio drwy e-bostio  [email protected]. Mae’r Gweinyddwyr Recriwtio yn annibynnol i’r panel cyfweld, felly ni fydd hyn yn effeithio ar eich cais.

Fel rhan o’ch cais, mae’n bwysig eich bod chi’n dangos yn glir sut rydych chi’n bodloni’r meini prawf dethol ar gyfer y rôl, drwy ddefnyddio enghreifftiau. Mae isafswm y meini prawf yn cael eu gosod ar 60% o gyfanswm y meini prawf.

Y dyddiad cau ar gyfer anfon ceisiadau ydy 12 hanner dydd ar ddydd Gwener, 26 Mehefin 2026. Bydd cyfweliadau’n cael eu cynnal wyneb yn wyneb lle bo modd drwy gydol Awst a Medi, ar amseroedd sy’n gyfleus i chi.