Ysgol Osbaston CIW

Ysgol Gynradd Eglwys yng Nghymru Osbaston yn Sir Fynwy ydy’r ysgol gyntaf yng Nghymru i ennill y Wobr Hyrwyddwyr Dim Datgoedwigo.

Ar ôl dysgu popeth am nwyddau sy’n risg i goedwigoedd, eu heffeithiau a’r atebion, ac ymchwilio i’w bwydlen ysgol, defnyddiodd myfyrwyr yn Osbaston eu lleisiau i alw am newid ac i ysbrydoli eraill. Roedd hyn yn cynnwys:

• Gwahodd y Dirprwy Weinidog Newid Hinsawdd, Lee Waters, i’w hysgol, lle buont yn rhannu gwybodaeth am ddatgoedwigo trofannol a’r brys o ran ceisio datrys y broblem. Gwahoddwyd cyfryngau lleol a chenedlaethol hefyd, a chyflwynodd y plant ysgol gyfweliadau yn y cyfryngau, gan gynnwys ar newyddion BBC Cymru.
• Gwahodd Cyngor Tref Trefynwy i fynychu cyflwyniad ar ddatgoedwigo, a chael ymrwymiad gan y Cyngor Tref i’w helpu i ddylanwadu ar fusnesau lleol a byd-eang mewn perthynas â nwyddau sy’n risg i goedwigoedd. Ymrwymodd y Cyngor Tref i ddod yn ‘gyngor tref sy’n hyrwyddo dim datgoedwigo’.  
• Cyflwyno eu canfyddiadau yn Siambr Cyngor Sir Fynwy, ac annog cynghorwyr i gynnwys meini prawf dim datgoedwigo yn eu polisi caffael. Rydym bellach yn gweithio gyda’r cyngor i gofrestru i fod y cyngor cyntaf yng Nghymru i fod yn Hyrwyddwyr Datgoedwigo.
• Gweithio gyda’r Cookalong Clwb i ailgynllunio ac i newid y ddysgl korma cyw iâr yn korma ffacbys sy’n gyfeillgar i’r hinsawdd, sydd wedi cael ei rannu gan fyfyrwyr mewn digwyddiadau lleol.
• Cyflwyno eu fersiwn eu hunain o weithdy Maint Cymru, a oedd â’r nod o roi gwybod i fyfyrwyr iau am ddatgoedwigo a nwyddau sy’n risg i goedwigoedd, a darparu atebion.
• Coginio gyda myfyrwyr iau a’u hysbrydoli, gyda chymorth y Cookalong Clwb, a defnyddio cynhwysion sy’n fwy cyfeillgar i’r hinsawdd yn lle cynhwysion sy’n risg i goedwigoedd.
• Ymweld â fferm Regen Ben, Fferm Townsend yn Nyffryn Gwy, i ddysgu am amaethyddiaeth adfywiol, a sut y llwyddodd y fferm i dynnu porthiant anifeiliaid soia o’u harferion ffermio.
• Cyflwyno eu neges i’r gymuned leol drwy ymgysylltu â grwpiau cymunedol lleol. Er enghraifft:
  • ‘Action on the Climate Emergency’ – grŵp newid hinsawdd yn y gymuned a wahoddodd y myfyrwyr i gyflwyno datgoedwigo trofannol yn eu gŵyl hinsawdd leol.  
  • Y carnifal lleol – gwisgo fel coedwig law gyfan ac ennill y wobr gyntaf.