Orchard

Mae Orchard yn asiantaeth farchnata integredig amlddisgyblaethol, sydd wedi ennill gwobrau ac sydd wedi’i lleoli yng Nghaerdydd.

Maen nhw hefyd yn bartner elusennol Maint Cymru a phan wnaethon nhw gynnal digwyddiad Busnes Dim Datgoedwigo yn eu stiwdio, roeddent yn gwybod eu bod eisiau cofrestru i fod yn Hyrwyddwr Dim Datgoedwigo. Felly, yn 2022, fe wnaethon nhw ddechrau ar eu taith dim datgoedwigo. Fe wnaethon nhw ddechrau drwy fynychu gweithdy gyda Maint Cymru, i ddysgu am ddatgoedwigo trofannol, siarad am yr adnoddau a’r templedi, a dechrau eu harchwiliad o nwyddau a gwasanaethau sy’n risg i goedwigoedd. Roedd gan Orchard dîm Eco yn barod, sy’n cynnwys cydweithwyr o bob rhan o’r sefydliad, felly roedd gan y gwaith hwn dîm ymroddedig i helpu i’w ddatblygu.

Yn ystod eu harchwiliad, fe wnaethant nodi nifer o gynhyrchion lle gallent wneud newidiadau syml, a dewis opsiynau amgen sy’n fwy cyfeillgar i goedwigoedd, e.e. coffi Masnach Deg a theisennau sydd ddim yn cynnwys olew palmwydd. Fe wnaethant hefyd edrych i mewn i’w colur a’u cynhyrchion glanhau, ac ymgysylltu â’u cyflenwyr i ddylanwadu ar arfer da.

“Mae dysgu a myfyrio wedi bod yn addysg go iawn i ni. Mae deall effeithiau negyddol olew soia a phalmwydd wedi agor fy llygaid… Mae hynny wedi bod yn bwysig wrth rymuso ac ysgogi pobl.” Tim Powell, Cyfarwyddwr, Orchard

Fe ddaethon nhw ar draws rhywfaint o anawsterau, fel cyllid moesegol a phensiynau, felly fe wnaethant herio eu darparwyr i ddangos eu hanes mewn perthynas â buddsoddiadau moesegol.

“Po fwyaf o fusnesau fel ni sy’n herio sefydliadau ariannol ac sy’n gofyn cwestiynau anodd, y mwyaf sydd ganddyn nhw i gyfiawnhau’r hyn maen nhw’n wneud, a cheisio gwella.” Tim Powell

Eu cam nesaf ydy datblygu polisi cyrchu moesegol, a gweithio gyda’u cyflenwyr i ddylanwadu ar newid, ac yn y tymor hwy, eu huchelgais i weithio ar eu pensiwn. Mae Tim yn cydnabod eu bod yn dal ar ddechrau eu taith ac eisiau mynd llawer ymhellach, a defnyddio eu dylanwad yng Nghymru i geisio annog eraill.

“Mae wedi bod yn wych gweithio gyda Orchard, o ddechrau ein hymgyrch Hyrwyddwyr Dim Datgoedwigo. Mae’r ddau ohonom wedi dysgu oddi wrth ein gilydd, ac maen nhw wedi rhoi adborth wych i ni i’n helpu i ddatblygu’r cymorth a’r adnoddau rydyn ni’n eu cynnig i fusnesau. Rwyf yn falch dros ben o weld yr ymrwymiad a’r camau ymarferol amlwg mae Orchard wedi’u cymryd ers dechrau ar eu taith dim datgoedwigo!” Angie Kirby, Swyddog Allgymorth Eiriolaeth, Maint Cymru